DardaniaExpress raportoi pak më parë se një 21-vjeçare me inicialet M.K., ka ndërruar jetë mesditën e sotme, rreth orës 12:43, në Qendrën Korrektuese për Femra në Lipjan.
21-vjeçarja e cila ishte pranuar në këtë qendër më 27 prill të këtij viti, ishte e dënuar për veprën penale “Dhunë në familje”.
Zëdhënësi i Shërbimit Korrektues të Kosovës (ShKK), Florent Gashi, tha se ajo ishte e dënuar me 1 vit burgim.
Në njoftimin për vdekjen e saj, ShKK bëri të ditur se nga dita kur është pranuar në këtë qendër e deri më 18 qershor, e reja ka qenë në vëzhgim çdo 15 minuta nga psikologu i Qendrës.
Po ashtu, bëhet e ditur se nga 2 nëntori, ajo ka qenë në observim çdo 30 minuta.
Pas vdekjes së saj, është njoftuar Policia e Kosovës dhe Prokurori, ndërsa ShKK njoftoi se ka filluar hetimet procedurale dhe administrative, si dhe ka themeluar Komisionin Hetimor Administrativ nga SHKK, i cili pritet të dalë me Raport Administrativ Përfundimtar.
“Stafi mjekësor i Stacionarit të Qendrës Korrektuese për Femra në Lipjan ka përgatitur dokumentacionin e nevojshëm lidhur me rastin. Autopsia do të verifikojë shkakun e vdekjes”, përfundon njoftimi.
